Still A Long Way To May

كلمه لانصار المانيو
المانيو راح يفوزون بالثلاث مباريات اللي باليد ويصير الفرق نقطه عن ليفربول ان شاء الله
وفي شهر فبراير ليفربول راح يصير تحت الضغط ويضيعون النقاط ان شاء الله
وفي شهر مارس المنافسه راح تحمى بين مانيو وتشلسي على اللقب ان شاء الله يحسم للمان
وشيء غريب بالنسبه للارسنال لما كانوا متصدرين الدوري ب 5 نقاط
وحسبالهم انهم فازوا بالدوري وشوفوا شصار فيهم
واعتقد ان شاء الله ان هذا اللي راح يحدث لليفربول

So For All Teams
It's

Still A Long Way To May

&

Glory Glory MAN United

ناس غير الناس

السلام عليكم اكتب لكم هذا البوست وانا باقي على طيارتي للكويت 17 ساعه

وكل ما دخلت وطلعت حطيت لي شغله في الجنطة بس بما ان الكووووويت برررررد حيييييييل فكل اللي ماخذهم وياي شورتات

وطبعا اول مره بالنسبه لي راح اتوهق لما ارد لاني ما عندي ولا دشداشه بالبيت هناك (تعرفووون نزل وزني :))

مو هذا موضوع البوست

البوست يتكلم عن ناس ما كنت اتوقع اني افارقهم في لمدة سنين او اشهر

امثال (ع.ف)و ( أ.ح) و (ب.ع) و (ب.ج)

وناس ايضا ما كنت اتوقع اني التقي فيهم

امثال (ر.ن) و (س.ن) و (ي.ر)

وشخص اتمنى ان الله يوفقه في حياته بعد ما فارقنا (م.ن) قبل فترة قصيرة

ورفيق العمر ان شاء الله في الدنيا والاخره (ط .ح)

فهؤلاء الناس فعلا ناس غير الناس

وان شاء الله انا راد للي ودعتهم وراح اودع اللي التقيت فيهم لمدة قصيرة

واسمحولي يالربع على القصور وسامحوني اذا قصرت معاكم او غلطت عليكم بشيء

اخوووكم في الله كويتاوي قديم

العــــــيـــن

بعد رأيتي لفيديو كليب الضرير للعفاسي

أغرورقت عيناي

واللي يبي يشوف الفيديو ينزله من الرابط فوق

واتحدى اي واحد يشوف الفيديو هذا ويتفكر في نعمه البصر وما يدمع

وأخذت اتفكر في نعمه البصر ونعمه الدمع المتاحه لنا في كل وقت وحين

العيون تعتبر من شغلات الجمال عند العرب والناس بهالوقت فيقولك فلان مشاء

الله عيونه مكحله طبيعيا ولا غيرها من الأمور هذي لكن

شنو احلى وأجمل العيون

أحلى عين خير العيون

وأي خير في عين لا تبكي ؟!

في الصحيحين أنه صلى الله عليه وسلم ذكر من السبعة الذين يظلهم الله تحت ظل عرشه يوم

لا ظل له إلا ظله رجلا ذكر الله أي وعيده وعقابه خاليا ففاضت عيناه : أي خوفا مما جناه

واقترفه من المخالفات والذنوب, وكان زين العابدين علي بن الحسين رضي الله عنهم إذا

توضأ وفرغ من وضوئه أخذته رعدة فقيل له في ذلك, فقال : ويحكم ، أتدرون إلى من

أقوم ولمن أريد أن أناجي. وقال أحمد بن حنبل : الخوف يمنعني من أكل الطعام والشراب

فما أشتهيه. وفي حديث أبي هريرة عن النبي صلى الله عليه وسلم أنه قال : { كل عين

باكية يوم القيامة إلا عينا غضت عن محارم الله ، وعينا سهرت في سبيل الله ، وعينا

يخرج منها مثل رأس الذباب من خشية الله تعالى } . وكان ابن السماك يعاتب نفسه

ويقول لها : تقولين قول الزاهدين وتعملين عمل المنافقين ، ومن ذلك الجنة تطلبين أن

تدخليها، هيهات هيهات للجنة قوم آخرون ولهم أعمال غير ما نحن عاملون. وقال صلى

الله عليه وسلم : { قال الله سبحانه وتعالى : وعزتي لا أجمع على عبدي خوفين ولا أجمع له

أمنين ، إن أمنني في الدنيا أخفته يوم القيامة ، وإن خافني في الدنيا أمنته يوم القيامة } .

وفي صحيح البخاري عن عائشة : " وكان أبو بكر رجلا بكاء لا يملك عينيه إذا قرأ القرآن"

وقال عبد الله بن عيسى : كان في وجه عمر بن الخطاب خطان أسودان من البكاء. وفي حديث

عقبة بن عامر رضي الله عنه أنه قال : { يا رسول الله ما النجاة ؟ قال : أمسك عليك لسانك

وليسعك بيتك وابك على خطيئتك }. وقال عبد الرحمن بن مهدي : مات سفيان الثوري ، فلما

اشتد به جعل يبكي فقال له رجل : يا أبا عبد الله أتراك كثير الذنوب ؟ فرفع رأسه وأخذ شيئا

من الأرض فقال : والله لذنوبي أهون عندي من هذا ، إني أخاف أن أسلب الإيمان قبل أن أموت.

وقال جعفر بن سليمان : اشتكى ثابت البناني عينيه، فقال له الطبيب : اضمن لي خصلة تبرأ عينك

، فقال وما هي ؟ قال : لا تبك. قال : وأي خير في عين لا تبكي؟

وهذي محاضره للشيخ الدكتور خالد الجبير عن التوبه

واسمعوا اخر قصة في محاضرة توبه عن حسن الخاتمة

الله يرزقنا واياكم حسن الخاتمة

واسمعوا قصة الكندي بعد وجزاكم الله خير

وختاما خلونا نحاول اننا نبكي ونستشعر عظمة الله والخلق حتى نفوز بنعمة كبيره

إلا وهي النظر الى الله عزوجل بهذه الأعين قولوا امين

والحمد لله رب العالمين

ون ون كويتاوي نمبر ون

تحديييث مهم :

المان يونايتد طق الأرسنال 4-0 بكاس أنجلترا وطلعه برى الكأس ويحليلهم الأرسناليه خخخخخخخخخخخخ

I aM a MaN

RoOnEy Is ThE mAn

هذا اول بوست رياضي اكتبه هني
وانا انسان كويتاوي منذ الصغر وعشقي للعميد نادي الكويت الكويتي ماله حدود

ومشاء الله العايله عندي من عمامي وابوي كلهم كويتاويين وطبعا العايله لا تخلو من العدو اللدود عشاق نادي القادسية واولهم الوالده اللي تشجع القادسيه بس جذي عناد بالوالد ولا هي مالها دخل بالرياضه

وعندنا بعض المستفيدين من المنافسه الشريفه بين الكويت والقادسية إلا وهم السماسره الصغار
وظيفتهم : تجميع الفلوس من كل الطرفين الكويتاويه والقادساويه
شلون : لما يحتدم الصراع يقول ابوي منو كويتاوي فيكم فيقولون احنا فيعطيهم فلوس ولما تسألهم الوالده منو قدساوي يقولون احنا وتعطيهم فلوس كذلك
من هم : عيال عمامي والجهال الي يجون بيتنا اللي باولى وثانيه رووضه

واذكر مره صار مزاد علني بقيادتهم بالمخيم يقولون من يعطينا دينار ونقول قدساوي او كويتاوي عالي عالي

وتم الفوز لنادي القادسية لسبب واحد وهو عدم وجود الداعم الرسمي اللي هو الوالد

أنا ماكان ماعي فلوس ( او مابي اعطيهم )

ونرجع للموضوع مال البوست
مع اني صعب اشوووف مباريات الدوري الكويتي الممتاز (( ادري بتقولون منو يتابعه بس انا اتابعه لان ماكو شيء كنت اسويه لما كنت بالكويت غير الروحه للمباريات ))

إلا اني كنت اسولف مع واحد من الشباب بالماسنجر وهو قاعد يقلب التلفزيون جان يقوول اووه مباره الكويت والقادسية قلت حط عليها ويقولي النتيجه وبعدها بطلت موقع تلفزيون الكويت قلت احط على الثالثه الفاشله بس ما اشتغلت من الموقع بعدين شفت الأهداف من النت

سيداتي سادتي

ارحب بكم في استاد مدونه راقي بتدويني

معكم انا محدثكم كويتاوي قديم من قلب الحدث

فاز بحمد الله العميد نادي الكويت على نادي القادسية بنتيجة 3-2 وعلى ارض القادسية ( خخخخ لايكون الدوري الأنجليزي بس )
ويقولووون العميد ابدع وسوا كل شيء وفاز وهو ناقص لاعب كالعاده وليد علي ينطرد بمباراة القادسية

وسجل الأهداف
للقادسية
سليم بن عاشور بالدقيقه 33
احمد عجب بالدقيقه 78

وللكويت
عبدالله المرزوقي بالدقيقه 43



الأنغولي موريتو بالدقيقه 55



علاء حبيل بالدقيقه 75



مشكر يا أحمد الأرقم من منتدى نادي الكويت لانه قاعد يخلينا نشوف الاقوال ولا بعد من يوتوب

وتعليق على مسجلين الأهداف الكويتاويين
المرزوقي اخيرا استفدنا من طول القامه شاء الله بتسجليك للهدف بالراس
موريتو يا انغولي والله بدعت في امم افريقا والحمد لله انك موقع مع الكويت لاني سمعت ان كذا نادي كان يبيك
علاء حبيل اخيرا بدأت تنسجم وتسجل مع الفريق يعطيك العافيه

وبهذا الفوز تصدر العميد الدوري ب26 نقطه وهو ناقص مباراه والثاني خلفه كاظمة ب 25 نقطة

::ومناشيتات الجرايد بعد الفوز::
الأبيض يظهر وقت الصجيه
الأبيض سلم على الاصفر بداره
ليلتك سعيده يالأبيض
الكويت يفتت تكتل القادسيه ب...ثلاثيه
الكويت هزم القادسيه وانفرد بالصداره

وان شاء الله نكتب بوست الفوز بالدوري

وختامها المانشيت مال البوست

ون ون ون كويتاوي نمبر ون

الدراسة مع نظره للكويت الحبيبه

الدراسه غثه وهم ثقييييييل على قلووووب اغلب الطلبه في كل مكان

ومع انها تختلف تدرجات الهم هذا فتشوووووف طالب الأبتدائية يحاتي حفظه للكلمة الفلانيه( يعني بحصة الأنجليزي)

وطالب المتوسطه يعاني مع قواعد اللغه العربيه وطالب الثانويه مع حل المسأله الفلانيه ( اذا كان علمي يعني )



وتعال لطالب الجامعه هههههههههههههههه

وما ادراك شنو شغله ومعاناته ومايبذله في سبيل الدراسه ((( مثلي أنا )))



وبعد فوقها طالب الدراسات العليا من تحضير للأطروحه و واحصائيات ومناقشة الرسالة

الحمد لله انا اعرف السوالف هذي لان عايلتنا فيها كل المراحل هذي



يعني الدراسه بروحها هم فما بالك اذا كان معاها غربه في بلاد الأفرنجة فهني الهم الأكبر



برووووحك ماعندك احد يونسك ولا عايله ترفه عن نفسك وياهم



ولكن جاني شعووووور مو طبيعي وانا ادرس لأختبار بايولوجي ( احياء)



وفاتح النت وحاط على موقع وزارة الأعلام الكويتية وقاعد اطالع القناة الأولى (الحمد لله صار في بث لها على النت مع انه مو صافي احيانا)



وانا ادرس واخذ لمحه على شاشه الابتوب وإلا فيه تكريم للناس ابدعوا ورفعوا علم الكويت في المحافل العالمية وبمسابقات دوليه



وانا لما شفت المشهد هذا تخيلت نفسي بعد 10 سنين وراد للكويت الحبيبه وحامل الشهاده ( ان شاء الله ) ورافع راس الكويت كلها واولهم الوالد والوالده و مرضي طموحي



جان اسرح ابووو 10 دقايق في الفكر هذا



وصار ريفريش وزاد عزمي وارتفعت معنوياتي فوووووق النخل فوووق

وان شاء الله عائدووووووووووووون عائدووووووووووووون للكويت الحبيبه
بالشهاده عائدوووووووووووووووووووووون

وعاشت الكويت وعاش الأمير وعاشوا اهل الكويت

صور لأجمـل بيت في الكـون

السلام عليكم

ما اجملها ان نعطر هذا البوست بصور لاجمل بيت في الكون

ألا وهو البيت العتيق

الكعبة المشرفه

هذا الحرم في السيل

وهذي ايضا صوره قديمه

وانا عجبتني هالصوره بعد

وهني الحرم المكي ولاحظوا المظلات على الجنب

مما يجرني للحديث ايضا عن صوره شفتها قبل فتره بالنت لمخطط جديد للحرم

واتمنى انه يكون صحيح الخبر هذا

لانه راح يخفف على حجاج بيت الله الحرام والمعتمرين في الطواف في الظهر والصيف في رمضان

والله يجزى حكومة المملكة على كل ما تبذله لحجاج البيت العتيق واخرها المرجم الجديد

واللهم ارزقنا زياره للحرم المكي في العطلة الصيفيه هذي قولوا امييين

ونشوووفكم بالبوست الجاي

No More LOL بســـنا لوووووول

No More LOL

هذا موقع يحاولون فيه انهم يقللون من استخدام كلمه لول
اولا شنو معنى لول
LOL
تعني
Lots of laughs
او
Laughing Out Loud
حسب المصدر اللي احبه والموقع المفضل لي ويكابيديا

وما أدري حنا يالعرب شلون خليناها لول يعني هي بالانجليزي لها معنى بس بالعربي شنووو يعني لول ؟؟؟؟

امووووت واعرف ؟؟ترجمه الكلمة هي يضحك بصوت مرتفع (بالفصحى )

على الأقل المفروض العرب يخلونها يبم

بس مووووو حلووووه وانا مو مقتنع فيها

الزبده فالموقع يقول ان الكلمة صارت تستخدم في غير محلها يعني حتى لو الشخص ماله خلق يكتبها وهي ما تعبر عن الموووووت من الضحك مثل ما نقووول


و الجراف يبين النسبة الفعليه لـــ LOL

حسب دراسات قاموا فيها

والموقع يقترح من اليوم اننا لما نضحك ومالنا خلق خل نقووول

loi

( Laughing On the Inside)

ويلا بلشووو بالحمله هذي

انا راح اقوووول مثل عادتي بدال lol ولا loi

خخخخخخخخخخخخخخخخخخخخخخخخخخخ

على الأقل لها معنى بالعربي او تعبر عن الصوت اللي يقووولووونه بعض الناس لما يضحكون وانا منهم أعترف

لماذا طنقطيطي ؟؟؟؟

طنقطيطي كلمة سألني عن معناها واجد من الربع والناس اللي ضايفهم بالماسنجر

وهذي الكلمة لها قصة مع انها قصيره ولكنها تحتوي على كل شيء يصيير بحياتنا

القصة هي ان هذي الكلمة (طنقطيطي) هي عباره عن كلمة لاختي الصغيره تقولها لما احد يسألها

منو تحبين اكثر امج ولا ابوووج ؟>>>><<< طبعا السؤال في حضور الأثنين الوالد والوالده

فتجاوب تقووول طنقطيطي وطنقطيطي وتهج وراها

وبعد مرات لما تكون هي ( أختي الصغيره ) في وضع استعباطي ومالها خلق ترد على السؤال لو شنو ما كان

فمن هذا المنطلق >>><<< ويييينه؟:)

حنا في حياتنا اليوميه نقول طنقطيطي لاشياء واجد ما اقدر اعددها
خصوصا في الكويت

والطنقطيطيه لها مستويات تتدرج

اخوكم
كويتاوي قديم