RoOnEy Is ThE mAn
وانا انسان كويتاوي منذ الصغر وعشقي للعميد نادي الكويت الكويتي ماله حدود
ومشاء الله العايله عندي من عمامي وابوي كلهم كويتاويين وطبعا العايله لا تخلو من العدو اللدود عشاق نادي القادسية واولهم الوالده اللي تشجع القادسيه بس جذي عناد بالوالد ولا هي مالها دخل بالرياضه
وعندنا بعض المستفيدين من المنافسه الشريفه بين الكويت والقادسية إلا وهم السماسره الصغار
وظيفتهم : تجميع الفلوس من كل الطرفين الكويتاويه والقادساويه
شلون : لما يحتدم الصراع يقول ابوي منو كويتاوي فيكم فيقولون احنا فيعطيهم فلوس ولما تسألهم الوالده منو قدساوي يقولون احنا وتعطيهم فلوس كذلك
من هم : عيال عمامي والجهال الي يجون بيتنا اللي باولى وثانيه رووضه
واذكر مره صار مزاد علني بقيادتهم بالمخيم يقولون من يعطينا دينار ونقول قدساوي او كويتاوي عالي عالي
وتم الفوز لنادي القادسية لسبب واحد وهو عدم وجود الداعم الرسمي اللي هو الوالد
ونرجع للموضوع مال البوست
مع اني صعب اشوووف مباريات الدوري الكويتي الممتاز (( ادري بتقولون منو يتابعه بس انا اتابعه لان ماكو شيء كنت اسويه لما كنت بالكويت غير الروحه للمباريات ))
إلا اني كنت اسولف مع واحد من الشباب بالماسنجر وهو قاعد يقلب التلفزيون جان يقوول اووه مباره الكويت والقادسية قلت حط عليها ويقولي النتيجه وبعدها بطلت موقع تلفزيون الكويت قلت احط على الثالثه الفاشله بس ما اشتغلت من الموقع بعدين شفت الأهداف من النت
سيداتي سادتي
ارحب بكم في استاد مدونه راقي بتدويني
معكم انا محدثكم كويتاوي قديم من قلب الحدث
فاز بحمد الله العميد نادي الكويت على نادي القادسية بنتيجة 3-2 وعلى ارض القادسية ( خخخخ لايكون الدوري الأنجليزي بس )
ويقولووون العميد ابدع وسوا كل شيء وفاز وهو ناقص لاعب كالعاده وليد علي ينطرد بمباراة القادسية
وسجل الأهداف
للقادسية
سليم بن عاشور بالدقيقه 33
احمد عجب بالدقيقه 78
وللكويت
عبدالله المرزوقي بالدقيقه 43
الأنغولي موريتو بالدقيقه 55
علاء حبيل بالدقيقه 75
مشكر يا أحمد الأرقم من منتدى نادي الكويت لانه قاعد يخلينا نشوف الاقوال ولا بعد من يوتوب
وتعليق على مسجلين الأهداف الكويتاويين
المرزوقي اخيرا استفدنا من طول القامه شاء الله بتسجليك للهدف بالراس
موريتو يا انغولي والله بدعت في امم افريقا والحمد لله انك موقع مع الكويت لاني سمعت ان كذا نادي كان يبيك
علاء حبيل اخيرا بدأت تنسجم وتسجل مع الفريق يعطيك العافيه
وبهذا الفوز تصدر العميد الدوري ب26 نقطه وهو ناقص مباراه والثاني خلفه كاظمة ب 25 نقطة
::ومناشيتات الجرايد بعد الفوز::
الأبيض يظهر وقت الصجيه
الأبيض سلم على الاصفر بداره
ليلتك سعيده يالأبيض
الكويت يفتت تكتل القادسيه ب...ثلاثيه
الكويت هزم القادسيه وانفرد بالصداره
وان شاء الله نكتب بوست الفوز بالدوري
وختامها المانشيت مال البوست
ون ون ون كويتاوي نمبر ون
هناك 6 تعليقات:
كفوو العميد
انا احترم اي واحد يشجع نادي غير العربي والقادسيه
لأني احس صج له ولاءوحب
مو مثل الباجي الي بس يلحقون الاسم والانجازات
بس عندي سؤال
كويتاوي .. ونادي الكويت
قلنا راكبين
بس المرزوقي والانغولي وحبيل شكو بشي اسمه كويت
يعي 3 لاعبين ولا كويتي .. اشهل حاله !!
ولا ناوين تجنسونهم مثلا ؟
متشكرين يا فندم .. وكثر من الرياضي رجاء :)
حياك الله يا Q80 Blogger
ويعني تعرف وانا اخوك هذا نص الأحتراف
فعادي هذول محترفين للكويت
على الأقل زين عندنا محترفين يونسنوا بالدوري ولا لو على لاعبين منتخب الكويت الوطني جان خرطي بخرطي :)
ولو يطبق الأحتراف الكامل راح تصير الهوايل يعني يمكن يغيرون اسم نادي الكويت ل كيفان يونايتد او شغله جذي
وحاضرين بنكثر الرياضي
والنعم المان يونايتد
بس الله يهداك كاتب موضوع كامل عن الدوري بالكويت...أخاف بس أكو عندنا دوري...والله لعب الشوارع أحلى من اللي يسمونه دوري الكويت
حياك الله يا فتى الجبل
وياخووك بس نونس نفسنا جذي بالدوري الكويت على قوله Q80 Blogger
اللي مسجلين الأقوال للكويت كلهم محترفين
ونورت المدونه بزيارتك
Thanks for the post........nadi ilkuwait is doing very well this year but I do not see them doing any better in the other b6olat like the AFC and that is what is important at the moment for ilkuwait you know as well as I do that ilkuwait wants the international b6olat more than the internal championships.
mabi akaren bas nafs real madrid and the man united the champions league means alot more than the la liga and the premiership league.
إرسال تعليق